唔知點解，次次當立法會要表決重要議案時，立法會議員葛珮帆（EQ）都咁啱唔喺香港，例如七月中當財務委員會審議擴建垃圾堆填區撥款申請時，EQ就代表立法會去咗英國國會上堂，唔使就佢所屬選區內嘅將軍澳堆填區表態，成功避免得失當區居民。
幾日前，立法會一個小組委員會討論係咪將西灣村納入郊野公園範圍，雖然西灣村再一次喺EQ選區範圍內，但佢再次因為去咗斯里蘭卡出席世界訊息峰會大獎國際論壇而缺席會議，要由黨友鍾樹根代勞鬧爆政府咁做好似「搶人老婆」。正因為樹根代EQ做咗醜人，咁EQ就可以同時討好當區居民同環保分子。
EQ缺席投票一不離二、二不離三，好似資訊科技界議員莫乃光（Charles）上星期五喺內會提出引用《立法會（權力及特權）條例》（特權法）索取行政會議文件徹查免費電視發牌一事，EQ當時亦係因為未返港而唔使投票，最後議案就因為自由黨投反對票而被否決。立法會下周三就會再次討論Charles嘅要求，唔知EQ今次會唔會坐定定喺度投反對票呢？