政情：大輝百厭 非公記杯茶
政治勢力雄霸沙田區嘅政團公民力量（公記）呢幾年發展浮浮沉沉，雖然曾經搵人合作，打正旗號出選立法會，但最後都係徒勞無功，加上幫建制派政黨助選又無着數，咁嘅狀態，想發圍都幾難啦！據聞公記最近就煩緊搵咩人加入「泵水」增加資源，而其中一個選擇就係一直被傳好想直選嘅工業界立法會議員林大輝，但點知情況一直膠着，原因係大輝行事太出位，西環睇唔順眼喎。
再過多唔夠一個月，除咗係聖誕節之外，仲係公記成立二十周年紀念。公記主席何厚祥話，佢哋會彷效其他政團搞周年晚會、推出手機App同舉辦一連串活動。其中重頭戲之一，就係更新佢哋嘅宣言，因為宣言喺呢二十年來無改過。至於內容包括啲乜呢？公記成員就話，可能會同發展會員、培訓青年政治人才等有關，似乎佢哋要好積極咁發展會務，令公記進一步擴大。
講嘢太激 作風不同
如果公記要擴大政治勢力嘅話，不得不提三年後嘅立法會選舉。公記由最初幫建制派政黨助選，到上屆打正旗號出選立法會，雖然最後都未能成功贏得議席，但下屆又會點呢？有公記嘅核心成員就話，其實佢哋歡迎任何政團、政黨一齊合作，但如果成日講嘢太激、太出位嘅話，就唔係佢哋嘅作風喇。
成日同建制派唱反調
另一邊廂，我哋又聽聞公記亦考慮到缺乏資源問題，所以認為大輝加入都係一個唔錯嘅選擇，但點解傾咁耐大輝都未入到公記呢？據了解，原因除咗公記內部有分歧，部分成員對大輝嘅出位表現有微言外，仲因為西環唔係太鍾意大輝呢個成日同建制派及政府唱反調嘅百厭仔喎！我哋曾致電大輝查詢，但係直至截稿之前仍未回覆。
除咗大輝外，另一九龍東立法會議員謝偉俊，其實都因為佢經常做出好似要脫離建制派嘅出位表現，令樁腳有唔少微言，莫非呢種出位風格唔再啱建制派嘅口味？定係建制派覺得出位風格對大家都無好處呢？