中環出更：廚餘變佳餚 美容天后顯心思
只要有心思，廚餘亦可變美食。非牟利組織「齊惜福」尋日舉行「深水埗惜福齊行動」，落區同市民推廣健康飲食及源頭減廢訊息。身兼機構發起人及贊助人嘅特首夫人梁唐青儀、社區廚房召集人「美容天后」曾裕齊齊着上圍裙，即場示範炒菜心及炮製橙皮朱古力，仲向街坊派發熱食飯盒同福袋，氹到公公婆婆勁開心。
梁太話，佢每逢去外國探子女時，就會變成大廚，幾乎餐餐自己煮，逢親有剩菜剩飯都唔浪費，餸頭餸尾第二朝就煲粥食。佢話，大家食橙後多數棄掉橙皮，其實橙皮好有食用價值，佢即場教街坊炮製酒店級嘅橙皮朱古力甜品。只見佢好熟練咁一邊做一邊教街坊，點樣用淡鹽水煲橙皮飛水，煲半小時後再換四、五次水去溢味，然後用慢火煲溶砂糖及水，再落橙皮煲廿分鐘，拎起放喺網架上風乾，如是者連續做三日，最後沾上煲溶咗嘅朱古力，就成為酒店級嘅甜品喇！
曾裕就用蔬菜批發市場回收嘅菜心，示範炒少油少鹽嘅健康菜心。早前佢喺屯門捐建一個社區廚房，每日提供逾八百個飯盒畀有需要人士，目前主要供應畀屯門及北區貧困市民，並將擴展到葵青區。為咗有更多人受益，曾裕最近再捐助添購爐頭，令每日可製作嘅愛心飯盒增加至一千五百個。
與梁太鄭泳舜落區行「膳」
深水埗區議員鄭泳舜（Vincent）都有到場，仲幫手派熱食飯盒及內有牛奶、淡奶及餅乾嘅福袋畀五百名街坊。雖然Vincent自細衣食無憂，但佢話屋企人都奉行食得唔好嘥嘅精神。齊惜福主席梁祖彬就話，希望透過今次活動推動源頭減廢，回收可用物資作愛心轉贈，齊齊為減少廚餘盡分力。
卓妮