認真回答 政府中伏
由於所有香港永久性居民可以豁免繳交買家印花稅，買樓唔使畀BSD，上次開會班議員追問雙非嬰兒係咪都可以買樓唔使畀BSD呢？
政府回應話，如果得幾歲嘅雙非嬰，當然要由監護人買至得。
對於呢個回應，班商界議員如地產建造界石禮謙、工業界梁君彥甚至商界林健鋒等聽見即如獲至寶，打蛇隨棍上問其他人做監護人，例如阿公阿婆得唔得，家姐阿哥又得唔得，最後連民主黨涂謹申都加入行列，話如果三唔識七嘅監護人到底可否幫雙非嬰買樓而唔使繳交BSD，點知政府又真係認真咁答，話三唔識七好難做到監護人。
雙方講完一大輪，主席李慧琼望一望個鐘，話會議時間夠鐘，下次開會再傾過。納稅人啲錢，就係咁浪費囉。