政情：八大商會「快閃」反台獨
「佔領中環」發起人朱耀明等人遠赴台灣會見民進黨前主席施明德，雖然已經係早兩個禮拜嘅事，但內地官媒以至香港建制派都不敢怠慢，連日排住隊發聲明譴責、示威抗議，為求每日有反「台獨」聲音見報。香港八大商會嘅阿頭，尋日亦終於數齊人頭開記招，發表工商界聯署聲明反台獨交差，但記招全程只係五分鐘，多個巨頭櫈未坐暖已經起身鬆人，可謂「快閃」反台獨。
記招開5分鐘散水
出席尋日記招嘅商會巨頭包括中華總商會會長楊釗、香港總商會主席周松崗等人，立法會議員林大輝呢頭同泛民聯署，要求政府發三個新免費電視牌照，嗰頭亦即刻做番老本行，以廠商會代表身份現身反台獨。
楊釗帶頭發言，照稿譴責泛民引入台獨勢力干預政改，係不計後果嘅冒險行為，對香港長遠發展百害而無一利。楊釗花咗三分鐘讀完呢五百字聲明，十七巨頭影埋大合照，前後唔夠五分鐘就草草結束記者會，拉大隊衝入升降機鬆人。雖然話商會巨頭分分鐘幾百萬元上落，但要交差都畀啲誠意好喎。