政情：你傷我忙 立會波友四散
年年「請槍」靠外援入波嘅立法會足球隊舊年原本有十八位議員，當中有唔少都係年輕力壯嘅新力軍，個個都矢言要幫立法會延續不敗神話。新會期伊始，雖然足球隊表面上繼續維持多場不敗紀錄，但足球隊爆發一股退隊潮，有六名隊員就以老弱傷殘等理由決定退出，令成隊足球隊剩返十三人。
立法會足球隊素來被譽為「長勝將軍」，○八年至今所有球賽都未輸過，最差嗰次都只係打和。足球隊唔係真係咁勁，事關立法會規定只要有六名議員報名，足球隊就可以用立法會名義出戰，其餘上場球員就可以自由發揮搵邊個都得。因此，足球隊每次都會「偷雞」搵甲組球員上場應戰，當中大部分入球都係靠呢班外援射入，而立法會議員們就喺隔壁陪跑。
研立會職員「替更」出戰
雖然今年有旅遊界姚思榮加盟，但退出嘅隊員包括胡志偉、郭榮鏗、張超雄同范國威，仲有謝偉俊同陳恒鑌（Ben）。幾乎場場比賽都出現嘅胡志偉就解釋話未來一年工作好忙，為免報咗名又唔見人，所以決定今年唔再報名參加，等有比賽時先夾時間參加。阿Ben話自己細細個扭傷腰後一直未好番，所以決定暫時退出足球隊休養生息，來年再戰江湖，而張超雄就話自己年事已高，擔心再夾硬嚟擔心會跌斷啲骨。
社民連梁國雄（長毛）雖然無退出足球隊，但佢前日踢波時整親左腳，仲入埋醫院接受治療。據長毛身邊人透露，長毛未來六個星期都要卧床休養唔可以返立法會開會，不過非常硬頸嘅長毛就揚言下月六號會申請出院，返立法會就是否引用特權法查免費電視發牌一事投贊成票。
足球隊隊長陳克勤分析退隊潮成因，佢話大部分球賽都安排喺星期六、日舉行，而呢啲時間就正正係直選議員落區同居民拉關係嘅黃金時間，所以有隊友退出都可以理解。佢透露足球隊來年會有四場比賽，秘書處正研究容許立法會保安同職員參加比賽，等無乜議員參加時都有啲立法會職員頂住。