政情：民選民政專員 曾德成唔諗隨口噏
地方行政高峰會「一拆四」，由民政事務局局長曾德成做主打，尋日第一場由區議員各抒己見，較有創意嘅建議包括民選民政專員同區議會一次過取得一屆撥款，曾德成話乜都可以考慮喎，睇吓點囉。
地區高峰會 陣容薄弱
尋日政府就喺港島搞第一次專題論壇，唔少議員老調重彈，要求加建文娛中心同暖水池等，南區區議員羅健熙就要求政府檢討畀區議會多啲錢、人、權。同區區議員柴文瀚直頭建議，民政專員將來要選舉產生。中西區區議員陳學鋒就建議政府一次過畀一屆撥款，而唔係一年一年咁畀區議會。
曾德成回應話，唔排除選舉產生民政專員可能性，連財政自主權都可以檢討，即係乜都可以考慮，答得咁順攤，係唔係認真考慮，大家心中有數啦。
論壇只係得局長常秘等官員出席，四場之後，官員至向特首總結意見。或者見到呢個「陣勢」，連示威者都慳番啖氣唔到。怪異嘅係，記者喺休息時間，唔好話接觸唔到局長，連同班區議員傾偈都唔畀，新聞官「邀請」記者去記者室，點解要咁做，真係令人費解。