中環出更：梁錦松係「機佬」
香港大學尋日舉行傑出學人講座，邀請咗為facebook寫第一個商用程式，現任星巴克董事嘅美藉華裔、喺香港出世嘅女強人史宗瑋演講，分享企業宣傳喺互聯網世代嘅蛻變。台上猛人演講，台下星光熠熠，前商務及經濟發展局局長馬時亨（肥亨）更全家總動員撐場。肥亨謙稱唔熟科技先嚟聽吓書，仲揭發前財政司司長梁錦松原來係「機佬」添！
講起政商界對社交媒體運用嘅睇法，肥亨即時將個波拋畀梁錦松，笑言佢最熟社交媒體喇，梁錦松尷尬否認，仲話「咁你即係話我係『機佬』啫？」。
金刀梁維繫親情當睇症
「機佬」身份被揭穿，梁錦松承認同太太伏明霞不時都會透過facebook、whatsapp傳情，平日就算忙緊公事都一定會聽仔女電話。相信所謂「機佬」嘅由來，係源於梁錦松當年借出手上嘅Palm畀初相識嘅伏明霞而撻着，最終抱得美人歸嘅愛情故事喇。
至於港大校務委員會主席梁智鴻就自稱係「石器時代」嘅人，黑莓手機在手嘅佢堅持以睇症嘅方式同家人聯絡，就係大家坐低見面慢慢傾喇！金刀梁覺得，無論科技幾方便同進步，維繫家人感情始終都係要見面，仲話「唔通喺電話度同病人診症咩！」
協成行董事總經理方文雄（David）亦係座上客，更兩度舉手想問問題添！集團主力以長線物業收租為主嘅David，原來都有為協成行設facebook專頁，讚好人數當然唔及零售行業嘅多，但近年佢涉足酒店業，其營運嘅酒店喺網上就相當活躍，因為唔少客人都會透過facebook表達對酒店嘅意見。
卓妮