單車徑護柱裝完又拆

「一裝一拆咁就唔見咗一大舊錢，我哋納稅人啲錢就係咁丟晒落鹹水海！」劉先生日前騎單車途經上水百和路，發現近保榮路體育館外單車徑突增設一排共三十六支塑膠護柱，令單車徑大為收窄。然而，劉於不足一個月後再次途經，大部分膠柱竟突然消失，質疑運輸署處事草率，大有浪費公帑之嫌，「無喇喇裝咗啲膠柱，唔夠一個月又拆晒佢，到底政府做嘢前有冇諗清楚？」

工程費三萬 街坊鬧無聊

另一街坊陳先生亦說，一直未獲悉當局有安裝膠柱的計劃，亦直指做法「無聊」，「如果呢度人流多，擺啲防護膠柱喺度都話可以分隔人同單車，但問題係呢度根本冇咩人行，點解要放咁多柱喺度阻住啲單車行？」陳指安裝與拆卸俱不合理，要求當局交代事件。

拆 膠柱不足一個月旋即被拆除，巴士站則已加設欄杆。

劉國勳指單車徑規劃屬上水區重要議題，懷疑運輸署為避免爭議誤裝防護柱。

運輸署發言人回應事件時稱，由於上述一段單車徑旁設巴士站，遂於路旁安裝塑膠護柱，以引導行人及巴士乘客使用行人過路處橫過單車徑，但又同時承認完工未幾即接獲市民意見，認為以欄杆代替部分膠柱更為適合。經研究後，巴士公司已按建議於站內加設可移動式欄杆，運輸署其後亦移除膠柱，涉及的安裝與移除工程費用約三萬元。

街坊心聲 陳先生：「運輸署好無聊啫，裝成排柱喺度又拆晒佢，係咪冇嘢搵嘢嚟做？」

伍女士：「政府原意係好嘅，但要用啱方法，裝咗膠柱啲人都仲會穿過去，根本冇用！」

當區區議員曾勁聰證實，當局從未就是次工程作地區諮詢，批評運輸署規劃欠周詳，最終不但浪費公帑，亦滋擾居民，「嗰度又唔係咁多人行，其實簡單加啲警告牌叫人唔好行單車徑就夠，政府好做唔做，無喇喇起幾十支膠柱，仲要起完又拆，唔止嘥錢，仲滋擾啲街坊！」

「北區有好多居民靠單車代步，人車爭路亦講咗好耐，相信運輸署今次係太過敏感，連平日冇乜人行嘅單車徑都加埋防護膠柱，點知搞出個大頭佛！」北區區議會交通及運輸委員會主席劉國勳表示，單車徑與行人路規劃屬上水區的重要議題，懷疑運輸署為避免爭議，誤在不合適地方加裝防護柱，結果弄巧反拙。劉要求當局進行規劃前，必須認真了解地區實際環境及需要，以免費時失事。

記者：楊育輝