政情：公民講場：唔向貪曾say no 栢志高食惡果

「貪曾」前特首曾蔭權爵士做天主教徒都做得貪慕虛榮過人，○七年時佢直接「柯打」時任香港駐歐洲聯盟特派代表栢志高幫佢約見教宗，之後就發生魔鬼交易醜聞。不過栢志高多次被問及貪曾落「柯打」嘅過程同事件細節，佢都唔肯答。栢志高尋日以運輸及房屋局常秘身份出席山頂一個步行活動，記者三次問佢有關問題，佢都say no唔答，聽到貪曾Donald Tsang個名時，更加講話絕對唔會答（Of course not）。其實如果佢早啲同貪曾say no，拒絕佢嘅「柯打」，咪唔使搞到一身蟻，搞到今日仲煩緊囉。