立法會內務委員會前日以三十三票反對、廿七票贊成，否決引用特權法索取有關免費電視發牌嘅政府內部文件，其中講過考慮支持議案嘅自由黨，旗下五名議員有四人投咗反對票，黨魁田北俊（田少）更加無投票，被指係議案否決嘅最大元兇。尋日田少等人就急急舉行茶敍，聲稱前日佢哋係一時唔小心，集體投錯票喎，揚言下月初會喺立法會大會投番贊成票。不過，有人就質疑該黨其實係「揀啱時間」投錯票，一邊保皇，一邊撈選票。
田少尋日解釋，佢哋一直反對向政府索取行政會議內部文件及三個申請者嘅商業敏感資料，提出動議嘅泛民議員莫乃光，喺投票前一刻修改動議字眼，講明唔會索取該兩類資料，自由黨理應改投贊成票，但由於當時佢已經離席，該黨餘下四名議員因而投錯票，佢就此向公眾致歉喎。
有熟悉投票程序嘅人士指出，內會投票不設分組點票，如果自由黨五票前日轉投贊成，就會變成三十二票贊成、廿九票反對，令議案順利通過，相反由於立法會大會需要分組點票，即使該黨喺下月六日全投贊成票，議案都肯定通過唔到，質疑佢哋係「揀啱時間」投錯票，方便向有關方面交代，而到大會投贊成票，自然可向選民交代。事實到底係點樣，只有田少肚裏面條蟲先知喇！