政情：爆病人私隱 廢鑊真冇品
平等機會委員會主席周一嶽（周一鑊）尋日獲邀出席第六屆香港性文化節開幕禮，但佢就話自己喺傳統家庭環境長大，冇人向佢灌輸性知識，搞到後來都唔知點教個女，點知囡囡醒過佢，同佢講：「唔使教喇，自己知喇！」之後佢仲意猶未盡，大爆有病人因性生活太激烈而整冧咗張碌架床，一家三口搵佢求醫。連病人私隱都爆埋出嚟，究竟周一鑊有冇醫德嘅呢？
近日有報道話香港居住環境狹窄，搞到連性生活嘅空間都不足，周一鑊就諗起自己做骨醫時有宗個案，話有家人住公屋，父母同阿仔瞓同一張碌架床，點知瞓上格床嘅父母性生活太激烈，搞到整冧咗張床，一家大細都要搵佢求診。佢又講到有調查指電視普及後令生育率下降問題，仲回應埋電視發牌同中港矛盾等問題，咩問題都答，真係乜都關佢事，不如搞好平機會工作先啦！
「鬼樣」獻唱勁驚嚇
「哈囉喂」就到，周一鑊又唱歌嚇大家，喺台上同香港性教育促進會副會長吳敏倫合唱《難為正邪定分界》，仲戴埋黑超扮魔鬼，唱到懶係high咁，只可惜佢個樣同把聲實在太驚嚇，叫佢宣傳性文化，真係擔心啲人被佢嚇窒囉。