【本報訊】直擊圍毆經過，好心借手機予傷者報警的夜班的士司機王先生，對手機意外跌爛大表無奈，大吐苦水：「我最無妄之災！」
王表示，事發時他駕着空載的士，駛至愛勤道時，目睹三名男子追着傷者「係咁揼」，看不過眼下開車追截：「咁啱我架車有Cam，拍到晒打人過程」。兇徒窮追二百米後，跑出路中心對跌倒地上的事主繼續拳打腳踢。
王形容兇徒手法兇狠狼死，過程觸目驚心。「傷者問我借手機打電話，後嚟警車一到，我望一望警車，傷者就攞咗我個電話係咁走，後尾仲整爛埋。」事後警員向他取走車Cam片段協助調查。
「我聽到佢哋講，係因為傷者溝咗其中一名兇徒條女，而被報復！」對好心借手機予事主，惟最終意外跌爛，王對此大感無奈。「我好心借部電話畀佢，又幫埋佢報警，但估唔到佢攞埋我部手機走，我最無妄之災！我擔心追討賠償會好麻煩，但都會考慮追究損失。」對於的士車Cam拍下案發經過，協助警方追緝兇徒，王對此感到欣慰。