政情：公民講場：語言偽術 泛民招牌

立法會議員李卓人上星期拉埋兩個自己友遠赴台北，打晒鑼鼓咁同鼓吹「台獨」嘅民進黨前主席施明德會面，喺鎂光燈下論盡「佔領中環」行動大計。當佔中遇上台獨勢力，隨即牽動中央以至香港建制派敏感神經，群起高調發炮還擊，狠批佢哋「勾結台獨勢力」，但李卓人就反指建制派大搞「抹黑」。經常喺網上評論時事嘅屯門區議員陳雲生都睇唔過眼，以前年背黨瞞妻、上尖沙咀香檳大廈鳳樓尋歡變「訪談」嘅民主黨前總幹事陳家偉作比喻，揶揄呢啲先叫「語言偽術」喎。無他嘅，大家都係泛民同道中人，梗係用番同一套語言偽術啦！