被喻為「吳得掂」嘅教育局局長吳克儉，講嘢錯完一次又一次已唔再係新聞，但佢尋日出席公開場合後面對傳媒時，唔知係咪又驚出錯，所以先後兩次都要引述「根據報道話……」，當中連早前由教育局新聞組代佢以書面回覆嘅內容，佢都要引述「報道話……」，反映佢同廣大市民差唔多，主要靠睇報紙接收新聞資訊。如果吳得掂擔大旗負責檢討十五年免費教育都要靠報道二手料嘅話，咁就真係死得喇！
吳得掂幾乎次次公開講嘢都唔多掂，於是早幾日見完上水粉嶺媽媽會代表後就選擇「走後門」速逃，唔接受記者訪問以圖減低再出錯嘅機會，改由教育局新聞組「補飛」代為以書面發言。不過，避得一次避唔到第二次，吳得掂尋日主持幼稚園教育國際論壇開幕禮後就焗住當面向傳媒發言，仲自動波話：「我亦很高興，根據報道，其中一間幼稚園希望建立一所新嘅幼稚園」。
當被記者追問新措施係咪只額外提供多幾十個位時，吳得掂不但無乘機糾正理應是會多幾百個學額，仲再一次引述報道話：「有報道說會有百分之五至百分之十的額外位數出現，我認為報道所說是有可能的」。其實吳得掂呢個局長做緊乜嘅呢？