政情：利益衝突 議員唔醒水
立法會議員個人利益監察委員會（CMI）原定喺上屆會期臨近結束前討論收緊議員個人利益登記規定，包括議員及配偶因立法會議員身份接受餽贈嘅詳情，秘書處仲向當時嘅六十位議員發出問卷徵詢意見，只係有關討論及後因為「拉布」而被迫擱置。點知到今屆立法會未收緊申報規定就爆出法國豪遊風波，其中四名舊議員未有「醒水」避嫌，反映政治危機意識薄弱，難辭其咎。
貪曾「開壞先例」累街坊
雖然立法會一早表明有意修改議員個人利益登記及申報規定，但民主黨何俊仁、涂謹申、民建聯葉國謙、保險界陳健波等四位舊議員仍然唔識得「醒水」避嫌，喺今年暑假時仲接受航空公司邀請，同屋企人齊齊去法國豪飲豪食玩足幾日。事件被揭發後，佢哋連同其他多名有份參加豪遊嘅新議員都惹來公眾批評，惟有逐一認衰兼賠錢，又事後孔明要求秘書處修改登記及申報規定。
CMI尋日就開會討論如何完善議員個人利益申報機制，議員劉慧卿就將責任歸咎「貪曾」前特首曾蔭權爵士任內接受富豪款待「開壞先例」，令公眾對議員期望不斷提高，先至會爆出今次豪遊風波，又話經此一役，以後都唔會有人邀請議員外訪。工聯會陳婉嫻就認為日後再接受商業機構邀請時應該特別要小心，唔好再因貪小便宜而招致瓜田李下，又建議秘書處採取陽光政策，每月公布議員接受款待詳情。
改善申報機制 各執一詞
工程界盧偉國就覺得秘書處唔可以單憑外訪行程嘅銀碼，來判斷該次外訪款待係幾咁豪華，建議應該從行程內容考慮是否恰當來判斷。至於有份豪遊法國而畀人鬧爆嘅會計界梁繼昌就話，現時申報制度較為寬鬆，又話西方社會流行邀請議員外訪時包埋配偶，但香港無呢種習慣，建議秘書長喺考慮係咪容許家人同行外，要求議員詳細申報行程。
委員會主席葉國謙就話，香港無可能好似美國議員咁成立一個委員會專責處理議員外訪審批，但就認為議員喺出發前可預早申報行程，等公眾判斷有無問題。由於班議員個個都有唔同意見，搞到秘書處要再以問卷形式收集全體議員後再作決定。收緊利益申報由上屆會期拖到今屆會期不特止，依家仲要一拖再拖，令人質疑班議員有冇心防止利益衝突囉。