每當社會出現爭議性議題，如果立法會議員逃避唔敢回應，傳媒就會譏諷佢哋做「鴕鳥」，所以做親「鴕鳥」都唔係好事。不過，立法會議員陳恒鑌（Ben）就反其道而行，話好喜歡做鴕鳥，仲話做得好舒服喎！
原來阿Ben有個習慣，就係做完嘢返辦公室，通常都會小睡叉電，但瞓喺張枱硬繃繃唔舒服，着晒燈又好難瞓，所以一班同事就夾計，上網買咗個最近大熱嘅「鴕鳥頭套」畀佢，等阿Ben將個頭、兩隻手塞晒入去，除咗可以阻擋燈光外，個枕頭又軟綿綿好舒服，絕對係補充體力嘅最佳伴侶，難怪阿Ben以「男士恩物」來形容。
不過，「男士恩物」呢個形容就吸引唔少網民朋友留言，問阿Ben到底個頭套有咩神奇功效。阿Ben可能怕網友誤會，即時解釋話因為有唔少女士都怕用呢個頭套會整亂晒個靚靚髮型，所以唔敢用呢個頭套，相反大部分男士都係短頭髮，所以咪係「男士恩物」囉！話時話，阿Ben應該買番批頭套送畀班黨友，等黨友們真係做「鴕鳥」嗰陣時，可以有番個頭套笠住個頭無咁醜嘛！
卓妮