中環出更:Greg蘇煩拆彈 猛捽手指尾

政府拖咗幾年先至發出兩個免費電視牌照,最終演變成一場政治風波,相信自稱盡晒力嘅商務及經濟發展局局長蘇錦樑(Greg蘇),心情肯定唔多好。上星期四下午大約兩點十五分,即政府公布發牌後兩日,Greg蘇同佢嘅政務助理曾裕彤等人食完飯後現身中環置地廣場,佢哋一邊行一邊傾,仲皺埋眉頭,唔知係咪傾緊點拆彈呢?

當日Greg蘇一行三人慢條斯理穿梭商場,大家好似心事重重。期間Greg蘇猛用左手捽擦右手尾指,全程都冇放低隻手。

學者:反映焦慮恐懼

卓妮問過臨床心理學家林玥彤,佢話一個人如果重複做一個動作,如果唔係身體唔舒服,就係反映佢內心焦慮、緊張同恐懼,所以藉此小動作紓緩上述情緒。至於不停捽手指,就要睇吓此人嘅身體健康狀況,例如係咪有「蚊瘌」覺得痕喎!

既然有緣相遇,卓妮趁機上前關心吓Greg蘇,問佢係咪食完飯?點知佢腳步停都唔停吓,繼續向前行,幾秒後至漫不經心咁回頭,勉強擠出些少笑容話:「係呀!」再問佢免費電視牌照風波可以點拆彈?佢心情麻麻話:「可以講嘅都講晒!」跟住就走人,期間佢兩位助手竟然上前阻擋隔開卓妮,急於幫上司開路。

原來啲政務官唔單止要做「狗仔隊」駐守立法會(目及)實議員出入,仲要做埋保安擋住記者採訪,正如公務員事務局局長鄧國威日前話齋,唔通做「保安」都係政務官經驗培訓嘅一部分?

卓妮

第一手消息請下載on.cc東方互動iPhone/iPad/Android/Windows Phone Apps