教育局局長吳克儉花名叫「唔得掂」，真係冇改錯，尋日佢原本要出席一個教育研討會做主禮嘉賓，但突然喺兩日前通知大會，自爆話因為特首梁振英（CY）要同班司局長開個緊急會議，所以佢嚟唔到，搞到大家都揣測政府係咪開會商討免費電視牌照風波。其實局長有事出席唔到公開活動都好平常，但吳得掂就連政府嘅內部消息都洩露出去，都唔知話佢太坦白定係太蠢。
本來吳得掂未能出席研討會都唔係咁大件事，最弊係大會連吳得掂指CY要召開緊急會議呢個解釋都講埋出嚟。CY喺呢個時候開緊急會議，大家都揣測係咪為免費電視發牌風波撲火？
不過，研討會講者之一嘅行政會議成員陳智思就澄清，其實佢都要出席呢個會議，但就唔係咩緊急會議，亦唔係傾電視發牌問題。直到研討會最後十五分鐘，吳得掂終於趕到，唔知佢係咪知衰，改口話開會只係有工作事項要傾喎。