政情：鄉局人多好嗌郊
政府疑似有意發展郊野公園觸動全港保育界同鄉民嘅神經，環保團體「保衞郊野公園」尋日搞咗個論壇，原本計劃請來公共專業聯盟政策召集人黎廣德、前立法會議員陳淑莊等六個「自己友」，聯手對撼由鄉議局派出嘅永遠顧問李耀斌，可惜呢批保育人士實在唔熟新界「鄉」情，尤其新界班鄉紳父老出名人多勢眾，鄉議局一召集，百幾二百個鄉民立即現身撐場，聲勢力壓保育人士。
賣地被斥違丁權原意
發展局局長陳茂波早前網誌漏咗口風，加上政府計劃將大浪西灣等幾幅私人土地納入郊野公園範圍，過去連日引發保育界唔少討論，唔少環保團體都劍指「丁權」制度。黎廣德尋日喺論壇提出，港府原本額外預留多三百幾公頃土地畀原居民起丁屋，理應夠晒有餘，但唔少鄉民寧願將丁權補地價轉手賣畀發展商起豪宅，喪失丁權原意。
鄉議局作為丁權集中營，喺呢場爭論中一向處於捱打狀態，鮮有公開反擊。鄉議局選擇動口不動手，由李耀斌「以一敵六」文鬥保育人士，佢歸咎問題出於政府過去多年冇為村民起路駁水電，唔少村民眼見條村咁唔方便惟有搬走，要求政府為偏僻村落提供交通配套，仲話係為傷健人士謀福祉添，博得全場鄉紳掌聲。
促當局提供合理賠償
淨係交通配套又點夠呢？李耀斌進一步指，要將鄉村納入郊野公園唔係唔得，舉例指景賢里、何東花園嘅賠償價都數以十億元計，點解新界鄉民啲土地就唔值呢？佢要求政府「攞啲資源出嚟」，為有升值潛力嘅農地提供合理賠償方案，換句話講，即係補償塊農地將來可能嘅價值。咁啱聽，班鄉民梗係再次拍爛手掌讚好啦，保育界頓感勢孤力弱。
土地正義聯盟嘅朱凱迪反駁，近幾年有近半丁權都被賣走，反映發展商滲入丁權買賣問題嚴重。李耀斌話，每個鄉民對自己間丁屋都有自主權，好難左右佢哋嘅決定，但政府只要肯為村民修橋補路就留得住佢哋咁話。如果修橋補路真係留得住啲原居民唔變賣丁屋，咁市區人咪好難買到村屋？到時啲村屋咪仲值錢？