中環出更：頭髮銀變黑 阿易順民意
立法會航運交通界議員易志明（阿易）向來以一頭銀髮示人，而呢頭銀髮就更加成為佢獨有嘅標誌。雖然佢平日鮮有出鏡，但旁人一見成頭銀髮，就會好易聯想到佢。不過，近日我哋喺立法會見到阿易，竟然發現佢把秀髮突然由銀變黑，莫非佢染髮想令自己睇落後生啲？
被讚後生咗十年
阿易解釋，佢染黑髮已經有一段時間，可能立法會平日新聞太多，所以先至無乜人留意到佢個頭。佢話去年立法會上任無耐，當佢同業界選民會面時，有選民話佢真人後生過上鏡，又話睇電視覺得佢好老，叫佢將啲頭髮染黑，可以望落後生啲喎。
既然業界選民有咁嘅要求，阿易於是急急腳去超級市場，用幾十蚊買咗盒染髮劑，之後就返屋企對住塊鏡慢慢染黑把銀髮。佢話染髮後唔少同事大讚佢個樣後生咗十年，但亦有人始終覺得佢之前感覺型啲。阿易仲話，依家每兩個星期就會染一次髮，但如果他朝懶得繼續染，就會重現昔日成頭銀髮喇。
卓妮