中環出更：唐太睇醫生 唔使老公陪
前政務司司長唐英年（唐唐）自從特首選戰結束後，與太太郭妤淺嘅關係似乎更加緊密，兩人十指緊扣行街、出庭，已係常見嘅畫面。不過，早幾日下午大約兩點半鐘，卓妮見到唐太隻身出現喺中環，佢手中拎住X光片，行色匆匆直入診所林立嘅萬邦行。當日頗大風，身形瘦弱嘅唐太手中嘅Ｘ光片被風吹到飄飄吓，唔知冇陪太太嘅唐唐去咗邊呢？
稱例行檢查 身體冇大礙
當日唐太着住件紅色連身花裙，外加一件灰白色外套，打扮一貫簡潔優雅。佢左手拎住由膠袋裝住嘅X光片，表情好嚴肅，由置地廣場急步直行去萬邦行，然後按升降機等待上樓。平時唐太總係好淡定，笑容可掬，好少見佢咁急促，唔知係咪身體有咩事呢？卓妮趁機上前同唐太打招呼，問佢要去邊。唐太終於露出招牌笑容，話要去睇醫生，仲話身體冇咩大礙，係普通嘅例行身體檢查啫！
隨後唐太搭升降機上十一樓，大約廿分鐘就落樓，原本手中拎住嘅Ｘ光片已經唔見咗，卓妮上前關心佢檢查結果係點？唐太就笑笑口話，身體冇乜嘢，今次只係嚟做一般女性檢查，而張Ｘ光片就擺低喺診所。咁唐唐點解唔陪佢？難得唐太好體諒丈夫話：「又唔係咩特別嘢，唔使陪喇！」咪睇唐太畀唐唐拖實時好似小鳥依人，其實佢亦有堅強獨立嘅一面嘅。
卓妮