中環出更：大劉搵喇嘛打救自己？
捲入澳門世紀巨貪案嘅華人置業集團主席劉鑾雄（大劉），尋日又如常健步如飛去灣仔富豪飯堂食晏，但今次除咗見到佢同女友呂麗君之外，仲見到約十名喇嘛添！大劉無端端搵成班喇嘛食飯，唔通因為官司纏身，要搵喇嘛打救自己？不過未知班喇嘛係咪打救佢之前，接載班喇嘛嘅兩部私家車就亂咁停晒飯堂對開第二條行車線，班喇嘛行入飯堂期間又阻礙途人，不如大劉索性買咗條街，兼改名叫「大劉街」罷啦！
尋日約中午十二點半鐘，着住黑色外套嘅大劉同呂麗君抵達飯堂，問大劉有冇嘢要發表時，佢就黑口黑臉兼木無表情直入飯堂，不作任何回應。
亂咁泊車 霸道阻途人
大概十五分鐘後，一部私家車同兩部七人車抵達，當時路邊明明有空位，但其中兩部車就唔泊，反而大模廝樣停泊喺第二線行車線，真係名副其實係「霸道」囉！喺呢個時候，大劉嘅三名保安及司機竟不約而同咁上前幫班喇嘛開車門，跟住約十名喇嘛急急落車，神色匆匆走入飯堂。
由於喇嘛眾多，又搞到「霸道」，一些途人要停低等班喇嘛進入飯店後才能繼續過路。不過，大劉「霸道」已經唔係新鮮事，最出奇係佢因咩事無端端約咁多喇嘛食飯呢？
莫非因為關乎大劉早前曾公開喊驚，大呻有人陷害佢、屈佢、被人霸佔財產，更自稱被人逼到走投無路，猶如被強姦，因為諸事不順，所以依家要搵喇嘛打救？
話說其中有部車插着「Live to Love」嘅旗幟，我哋翻查資料，「Live to Love」係一項國際人道主義活動，由慈善家嘉旺竹巴法王創立，專注教育、醫療服務、救災、遺產保護及環境可持續發展共五個令世界變得更美好嘅方向。唔知佢哋今次同大劉食飯係為咗專注邊個方向呢？
拒回應被廉署調查一事
就尋日所見，其中三名喇嘛進入飯堂後五分鐘就先行離開，之後再有三名喇嘛近兩點鐘離開。十五分鐘後，就輪到大劉同呂麗君一同離開喇。問大劉係咪曾經被香港廉政公署調查，點知佢又係乜都唔答就上車離開喇，又係鍾意講就講，唔講就唔講，真係唔知佢想點。
卓妮