政界早排盛傳馮煒光接受IC一職，馮煒光喺接受電視訪問時眉飛色舞咁大談佢嘅雄才偉略，話要將IC打造成白宮發言人，但傳聞究竟是否屬實，馮煒光就話：「三個字：不予置評」。政圈因為馮煒光講「三個字」其實講咗四個字笑到碌地。
馮煒光嘅「三個字」句式尋日喺立法會畀議員郭榮鏗寸，話說郭榮鏗喺特首答問大會上，指免費電視發牌「三個字：黑箱作業」，議員們都立即明白佢喺寸緊馮煒光，於是引起哄堂大笑。
馮煒光嘅「三個字」句式唔單止喺政圈頗為「流行」，好事之徒仲對佢嘅委任引頸以待。點解？因為諗住一定有笑料嘛。對於呢種心態，唔知政府點諗呢？三個字：「不予委任」？會唔會多一事不如少一事呢？