政情：工總變政府覓地瞭望台
政府制訂政策對市民影響好深遠，高官如果唔企喺一定高度，就好難睇得通透。位於長沙灣工業區嘅香港工業總會總部，原來做咗高官搵地起公屋嘅「瞭望台」。工業總會主席劉展灝（Stanley）話，好多高官到訪工總，由出升降機門開始，個個都不期然被開揚嘅景觀吸引，成日問呢笪、嗰笪地係咩地方。包括特首梁振英及多名局長級官員都喺度瞭望過。照咁講，唔通政府搵地靈感就係咁嚟嘅？
尋日Stanley喺總部會議廳同傳媒茶敍，我哋透過玻璃窗四處望，遠處係剛被政府納入公屋計劃嘅長沙灣高爾夫球練習場，轉個九十度，私人屋苑「西九四小龍」就喺眼前，對面就係空曠嘅長沙灣臨時家禽批發市場一帶，聽講亦引起高官「關注」。Stanley笑笑口話，佢哋三十一樓嘅會議廳擁有三百六十度環視嘅高度優勢，對於深水埗區嘅發展現況一目了然。不過佢強調，高官上樓嘅目的係同工總會員交流溝通，「瞭望」係臨時加插嘅節目啫！
