教育局局長吳克儉（吳得掂）早前喺北區幼稚園搶入學申請表風波中辦事不力，令到佢所餘無幾嘅民望，喺最新民調大跌排尾二。尋日佢出席立法會大會，回應末代高考生有好成績但冇書讀嘅爭議時，不但無意出手相助，仲大講風涼話，建議手持幾條Ａ嘅高考生轉讀副學士，成績好話唔定可以繼續大學嘅夢想咁話。咁吳克儉民望排尾二又使唔使「燉冬菇」做番副局長先呢？
教育局由高級程度會考（高考）轉制至中學文憑試（DSE）時，冇盡力協調各大院校制訂同過往收生分數相若標準嘅準則，令佢哋成績就算高於所報學科嘅最低要求，甚至手持幾條Ａ都未能獲院校取錄。提出口頭質詢嘅勞工界議員郭偉強就要求吳得掂幫幫手。
不過，吳得掂強調院校收生係「擇優而取」，教育局尊重院校收生自由，唔會亦唔應該干預，仲反建議學生可以先入讀副學士，成績好嘅話仍然可以繼續入大學嘅夢想喎。聽講吳得掂當年會考都係「九條尾」，即係九科Ｃ級或以上，根據佢嘅準則，唔知要佢先讀副學士再博入大學，佢又制唔制？