政情：奪最佳論文獎 趙心樹威番鋪
浸會大學傳理學院前院長趙心樹去年因涉嫌「偷步」公布特首選舉民調惹公憤，浸大極速完成調查報告後，趙心樹只被「搣柴」無得做院長，但仲保留浸大講座教授教席。過去一段日子，趙心樹似乎無乜動靜，但浸大尋日就公布佢一篇探討「中介效應」嘅論文，最近獲權威國際學術期刊《消費者研究》選為二○一三年度最佳論文，唔知算唔算係將功補過呢？
親赴芝加哥領取
呢篇「中介效應」論文由趙心樹同兩名美國大學嘅學者合撰，分析唔同因素互相影響嘅機制，喺《消費者研究》特別推薦嘅重點論文之一，篇論文更已經被引用六百幾次，仲幫《消費者研究》首次成為營銷學領域影響因數最高嘅期刊。趙心樹早前已親赴芝加哥，出席消費者研究學會年會領取獎項。
趙心樹今次威番鋪，隨時仲可以幫助浸大提升大學排名，亦可以證明畀浸大上下睇，佢繼續留喺浸大係有價值嘅。查實浸大校長陳新滋當時曾經講過，趙心樹一早獲終身教授席，除非有重大犯錯，否則校方唔可以隨便炒佢，何況依家仲幫到浸大提高國際地位。