政情：廣東計劃 工記得個吉
本月推行嘅「廣東計劃」（下稱計劃）讓移居廣東省並符合申請資格嘅香港長者，喺毋須每年回港情況下獲發每月一千一百多元高齡津貼，內地班長者當然讚好啦，但據聞一直倡議計劃嘅工聯會（工記）就有啲微言，皆因工記做唔到有關計劃嘅代理機構，但到頭來又要瞓身無償地幫長者處理報名申請，等於幫獲選嘅代理機構白做。不過，工記將來選舉或可得到內地長者嘅香港家屬支持，都叫做執番個吉啦！
為國際服務社作嫁衣
社會福利署今年八月開始接受合資格長者申請「廣東計劃」，之前曾招標搵機構代理，而工記一直跟進計劃，加上有廣州、深圳、惠州等內地諮詢服務中心，一心以為中標機會高啲啦，但奈何政府標書要求規定入標機構要係慈善機構，又要喺內地有若干年服務經驗，基於工記嘅中心並非以慈善機構註冊，自然中標無望，最終由香港國際服務社冷手執個熱煎堆中標，合約期為三年。
至今處理約四千申請
國際服務社做得計劃嘅代理機構，自然以為會以全包宴方式，即由幫助長者報名申請，至津貼到長者手後嘅後續工作。不過，有知情人士話，代理機構只係負責會見居於廣東因健康理由未能回港辦理申請手續嘅長者，以及進行個案覆核及處理查詢等，真係落手落腳幫長者報名申請並唔係佢哋嘅工作。據聞報名申請工作無啦啦要工記填補，底因係佢哋喺內地有經驗、有網絡幫助過長者，至今已處理約三、四千份申請，佔當局已處理嘅申請近三成，相信工記理事長吳秋北最清楚。
事實上，工記做得服務本來就唔打算有乜着數，但工記中人就出聲呻話，如果工記係中標嘅代理機構，一切會係更加名正言順，依家反而白做無實質回報。不過，呢位工記中人就計漏咗一啲無形嘅利益，只要諗吓點解咁多年來工記要喺內地設立諮詢服務中心提供免費服務，自然就會搵到答案喇。工記幫過內地啲港人長者，相信佢哋香港家人會知道同記得嘅，必要時或會感恩圖報，所以何必咁短視呢？