政情：中環出更：逼老公食齋 曉暉有妙計
尋日係世界糧食日，環保社會企業Green Monday同香港國際機場啟動「無肉星期一」協議，行政會議成員陳智思（Bernard）、民政事務局副局長許曉暉（Florence）獲邀主禮。茹素逾廿年嘅Florence話，佢兩個囡囡都係素食者，而且運用妙計逼到食開肉嘅老公都要乖乖食齋。正因為佢老公少食肉，搞到奶奶出動買肉去「接濟」。
雪櫃得蔬果 「冇得畀佢揀」
究竟Florence有乜妙計逼老公就範食齋呢？佢話：「老公一打開屋企個雪櫃，Well，全部都係五穀、蔬菜生果、果仁，冇得畀佢揀！」於是食素成為佢老公唯一選擇，搞到奶奶要買肉類過「接濟」個仔。佢坦言，初初長輩都有擔心兩個囡囡茹素會唔夠營養，但眼見囡囡快高長大又冇乜病痛，都放心畀佢哋繼續食齋。
至於早年患有血管病嘅Bernard，腎功能只得常人嘅一半，所以對食物嘅選擇更加小心，多年來堅持戒食紅肉，只食雞、魚同蝦，食沙律唔落醬汁，亦盡量避開有芡汁嘅菜式，令身體三十年來維持相同狀態，佢笑言：「以一個唔正常嘅人嚟講，已經算正常」。佢為咗令身體狀態更Fit，近半年多菜少肉、恒常運動下減多七磅，依家已維持喺一百五十四磅。
Green Monday創辦人楊大偉同魏華星就話，香港國際機場係全球首個全面推行素食嘅機場，現已有五十七間食肆及貴賓室響應，喺每周一甚至每天供應素食，預計每年最多可減少超過四千公噸碳排放。
卓妮