政情：生日收蛋 葉劉愛女有「黃」管
新民黨主席葉劉淑儀乖女Cynthia尋日廿四歲生日，葉太呢個廿四孝媽咪早幾日幫囡囡喺立法會搞咗個驚喜生日派對，新民黨執委譚榮邦更向Cynthia送上一隻鹹蛋畀佢作為生日禮物。
葉太話根據老人家所講，壽星仔壽星女喺生日收到雞蛋時，一定要食咗個蛋黃，因為粵語中「黃」、「王」、「皇」三字同音，所以用蛋黃嘅「黃」字作諧音，就有「有王管」嘅意思，希望仔女們大個後即使「有毛有翼」，都要聽教聽話，遵從長輩教誨。所以葉太尋日喺社交網站祝願Cynthia每天過得開心之餘，亦都要佢記住，雖然佢已經長大成人，但依然係「有王管」，要聽晒媽咪話喎。
（互聯網）