時下特區高官個個寧願每個星期都匿埋喺冷氣房寫網誌，都唔肯行來出嚟面對公眾。政府團隊鍵盤戰士之一、財政司司長曾俊華（鬍鬚曾）每逢周日都會喺網站發表每周網誌，即使當日撞正農曆正月初一，定係早排放咗兩個星期大假，鬍鬚曾依然風雨不改繼續寫blog。不過，尋日當大家例牌上財政司司長網站瀏覽鬍鬚曾嘅大作時，竟然發現今個星期嘅網誌欄空白一片。
莫非鬍鬚曾趁住出訪美國華盛頓，所以乘機偷懶唔做功課？原來，鬍鬚曾今個星期並唔係無寫blog，只不過係因為官方網站出現系統故障，搞到外界無緣睇到鬍鬚曾寫咗啲乜。而網站喺夜晚先至恢復正常。
其實佢今次就趁為期一周嘅美國之行，喺網誌中大談美國財政和債務危機，講佢以中國代表團成員身份，出席喺華盛頓舉行嘅國際貨幣基金組織及世界銀行集團年會，仲同聯儲局主席伯南克會面，討論美國債務上限、貨幣政策及全球經濟展望等議題。佢話如果美國真係出現債務違約，將引起金融市場大震盪，又話政府會密切注視國際市場變化，做好最壞準備。