政情：架空下屬 貪曾慣晒
「貪曾」前特首曾蔭權爵士早前被傳媒揭發，佢涉嫌濫用職權直接命令其下屬、當時嘅香港駐歐洲聯盟特派代表栢志高進行「魔鬼交易」見教宗。原來貪曾呢啲行徑真係慣晒手勢，佢早喺二○○三年做政務司司長嗰時，就已經親自介入城市規劃委員會將灣仔會展地庫部分停車場改為二手汽車展銷場嘅審批，搞到本來有政府部門反對，最後都唔敢出聲。當時被佢繞過嘅，包括房屋及規劃地政局局長孫明揚同佢嘅「曾兄弟」、時任房屋及規劃地政局常任秘書長曾俊華。
直接施壓 益自己友？
話說新世界旗下嘅會展，早喺○一年就將部分地庫停車場改為汽車展銷場，當時地政總署話違反地契，新世界直到○三年六月先向城規會申請，將三分之一車位改為「臨時展覽用途」。本來運輸署話驚交通阻塞反對建議，點知貪曾同年九月向規劃署、運輸署、地政署同埋環境運輸及工務局等部門高級官員發出文件熱烈提出理據，講到二手汽車展銷場有商業創意，政府唔應該扼殺，又話展銷場搞咗咁多年，證明唔會為附近交通造成負擔，仲明確要求部門幫助呢啲商業活動，呢啲仲唔係夾硬將生米煮成熟飯，向部門施壓？
貪曾去信之後唔夠一個月，城規會都會規劃小組委員會就喺十月審議件事，結果當然無人反對，票都唔使投就批准。相隔七個月後，新世界旗下嘅新創建集團，宣布委任貪曾細佬曾蔭培做執行董事，惹嚟唔少人閒言閒語。
辯稱係政府「正常運作」
展銷場事件嘅始末，有部分已經披露，最新嘅焦點係貪曾原來又兜路落柯打，當孫明揚同曾俊華冇到，直接向佢哋啲下屬表達意見，佢當時竟然仲詭辯喺社交場合收到「公眾人士」指政府官僚，搞到商界經營困難，並以會展地庫停車場做例子，所以直接向部門首長查詢，話咁樣有助監察部門工作同埋效率，屬於政府「正常運作」，仲話係佢嘅「慣常作風」添。雖然當時新世界集團總經理梁志堅向貪曾求助，但係邊位「公眾人士」會咁得閒走去講會展地庫停車場，答案都好明顯啦，睇嚟貪曾呢啲「慣常作風」，之後只會愈揭愈多。