中環出更：頻食檸檬 「光」棍多年
經常喺報章撰文，以中產代表自居嘅南區區議員馮煒光，自從有消息指佢加入政府做新聞統籌專員（IC）後，佢寫過嘅每篇文都即刻升價十倍，其中一篇大談自己追極都追唔到女朋友嘅潮文，就喺網上瘋傳。原來單身多年嘅馮煒光，一向積極追女仔，但唔係食檸檬就係做觀音兵，仲試過「愛人結婚了，新郎不是他」，只能同女仔過住啲曖昧不明嘅日子。
政界傳聞馮煒光喜歡同電視台女主播混熟，但從未開花結果，原來佢篇潮文就曾經透露，多年來唔係被女仔拒絕，就係同女仔斷斷續續單對單食飯，正當以為有機會，對方先表態話有男友，搞到馮煒光無言而對。文中佢又慨嘆，自己見多識廣唔係宅男，講電影可如數家珍，講菲律賓人質事件都答到嘴，但唔知點解，總係同異性發展唔到親密關係。
白鴿身份 無安全感
既然香港無市場，馮煒光都試過北望神州同內地女孩交往，但因為曾是民主黨身份，女方無法安心，戀情無疾而終。唔知今次盛傳佢做IC嘅遭遇，同佢過往追女仔有無相似嘅地方呢？
卓妮