中環出更：姚君達拖女友甜蜜談情
米蘭站主席姚君達（Bryon）自離婚後，感情一直未有着落。前日卓妮喺沙田馬場發現佢同一名貌似「跳水公主」郭晶晶嘅長髮靚女一齊，兩人旁若無人，非常溫馨。事後卓妮致電Bryon查證，佢直認與靚女正在發展中，Bryon護花心切，叫我哋唔好寫得咁盡，話唔想嚇親女友。
前日下午約三點半，身為馬場常客嘅Bryon如常現身，不過今次罕有地與女伴同行。佢哋雙雙前往馬匹亮相圈旁邊嘅會員看台，企喺人流相對稀少嘅頂樓，似乎係想靜靜享受二人世界。該名靚女身穿黑色喱士短裙露出美腿，戴上墨鏡甚有星味，與有型有款嘅Bryon好登對。
小鳥依人 旁若無人
起初Bryon同靚女靠近欄杆有講有笑，又指手畫腳咁向對方介紹馬場環境，大講笑話氹靚女開心，女方似乎相當受落，甜笑並翹實男方。二人漸漸放下戒心愈企愈埋，期間Bryon主動輕抱女伴，並在對方耳邊喁喁細語，女方即小鳥依人，雙方談情近一小時後先至返回馬會廂房。
Bryon透露，佢哋係經朋友介紹認識，女友叫做Jessica，從事酒店業，識咗大半年至開始發展，今次係首次帶對方入馬場。問佢前妻知唔知呢件事？佢回答：「唔知，我哋互不干涉對方生活，但間中有食飯見面。」佢坦言，呢段感情初萌芽，唔想畀女方太大壓力，若然感情穩定咗，一定會同大家公布喎！Bryon曾自爆與前妻離婚後繼續同住，當時佢仲話二人隨時會再婚，不過原來佢哋已經分咗居一年，應該唔會復合喇。
卓妮