政情：公民講場：打救高球場 鄭文雅：減價先啦

早前有聲音要求政府收回佔地一百七十公頃嘅粉嶺高爾夫球場起樓，以取代新界東北發展計劃。擁有粉嶺高爾夫球場嘅香港哥爾夫球會，日前就同一班高球界代表召開「武林大會」商討救亡大計，但有部分代表對粉嶺球場過往冷待本地球手有微言。其中香港華人女子高爾夫球總會主席、前港姐鄭文雅，就直斥對方對非會員收費過高，令經濟能力一般嘅高球愛好者卻步。粉嶺高球場最後答應檢討收費同開放更多時段畀非會員打波，以換取佢哋支持保留球場。