微生物專家、公共醫療醫生協會會董何栢良尋日喺電台節目上自爆，以前讀醫科時都做過「逃學威龍」，但唯獨候任醫院管理局主席梁智仁嘅課堂佢會百分百出席，事關梁教授嘅堂冇悶場喎！佢又相信梁接掌醫管局後，可以帶領醫管局轉危為機，加強管理質素及監察管理層表現，鼓勵醫院聯網服務上嘅合作，杜絕聯網嘅「山頭主義」。
何栢良話，當時做骨科教授嘅梁智仁好有威嚴，同學對佢又敬又畏，加上佢可以活用病例深入淺出咁教書，上佢堂絕對唔會悶到瞓着覺。
佢仲話，梁智仁好平易近人，後輩有咩疑難雜症，直接打電話請教佢都冇問題。佢相信梁接任醫管局主席，能夠得到醫管局上下醫護人員嘅尊重同信任，仲可以同食物及衞生局局長高永文一齊提升醫管局管理質素、將醫管局嘅數據全面透明公開。
何栢良又引用英國前首相邱吉爾嘅名句，鼓勵新主席與同事樂觀面對困難：「悲觀主義者在每個機會中看到困難，樂觀主義者在每個困難中看到機會。」