政情：獻「第一次」事敗 謝偉俊谷氣
尋日有新樓盤加推貨尾，仲以回贈買家印花稅（BSD）作利誘，吸引幾千名買家排隊，但到場只係抽籤，唔一定買到，證明樓市依然仲係咁瘋狂。有份審議BSD嘅立法會議員謝偉俊（Paul）尋日都入場碰運氣，原來阿Paul買樓經驗無數，但以往都用公司名義買，家陣BSD生效抽重稅，先焗住第一次以個人名義買樓。不過，尋日佢抽唔中籤，只能安慰自己慳番千幾萬。
首以個人名義買樓唔中籤
樓市淡靜咗一輪，當有發展商話回贈BSD後，旋即吸引大批買家，連負責審議BSD嘅阿Paul都被吸引。阿Paul話，預咗擲過千萬元入市，因為睇好樓市前景，尋日親身出現，仲想順道感受下BSD威力。點知去到先發現幾千人排隊，估唔到奉獻「第一次」都要等咁耐。
最終樓就買唔到，但依然一肚氣，阿Paul狠批發展商安排不周，夾硬要幾千人打晒蛇餅排隊，又唔同人講等幾耐，懷疑發展商想借買家造勢，搞到好似好多人買樓。阿Paul話既然發展商無當班買家係人，買唔到樓都無蝕底。