政情：陳克勤工作報告玩抄襲？
人有相似物有相同就聽得多，原來連工作報告同免費報章都可以好相似。話說新界東居民最近開始收到立法會議員陳克勤嘅工作報告，驟眼睇份報告嘅封面設計同某份免費報章嘅封面好相似，惹來抄襲疑雲，被質疑有侵犯版權之嫌。克勤對於工作報告令人產生誤會表示唔好意思，再三強調工作人員派發時一定會講明係議員工作報告。
封面參考免費報惹疑
點解克勤份工作報告要玩「抄襲」呢？佢話自己一向都係製作傳統正方形嘅工作報告，但近年見到免費報章概念幾成功，所以最近製作工作報告時就叫設計師參考吓，最終面世嘅工作報告合共有八頁，底頁係印有旗下所有議員辦事處嘅聯絡方法，點知個封面搞出個大頭佛。
至於工作報告嘅內容方面，克勤話有參考並集各家之大成，好似佢開設咗名為「勤觀點」嘅欄目，趁機向居民表達對各個熱點議題嘅意見。另外，報告也有圖文並茂嘅漫畫，好似最新一期就係講述佢身為立法會政府帳目委員會成員，有份參與公審「貪湯」前廉政專員湯顯明嘅一問一答等，希望帶畀居民新鮮感喎。