政情：貪曾廢鑊 雙非罪人

其實香港一向都有中港家庭存在，所以大部分港人都接受到單非，但講到雙非問題，就要追溯到貪曾喺○九年推動嘅六大優勢產業，而時任食物及衞生局局長周一鑊都有份主力發展其中嘅醫療產業。佢哋本身諗住搵多啲內地人來港睇醫生，點知來港睇醫生嘅唔單止係內地人，有大部分更係內地雙非孕婦，所以搞到愈來愈多雙非孕婦來港產子，逼爆完醫院床位，之後就搶購奶粉，令港媽怨聲載道。

議員斥港府冇嚴肅對待

早幾年出生嘅雙非兒童，依家已經到達適齡入學，於是就爆出爭幼稚園學位風波，港童父母自然深受其害，而乜都唔識嘅教育局局長吳克儉自然首當其衝硬食。相信遲多幾年就輪到爭小學學位、中學學位等，所以搞到今時今日嘅困局，貪曾同周一鑊自然成為罪魁禍首。立法會議員范國威尋日批評，港府喺過去數年都冇嚴肅對待雙非孕婦來港產子及雙非學童問題，所以認為港府應堅持「港人優先」嘅原則，同時制訂新校網嚟處理跨境學童問題。

唔知呢番話係咪篤正周一鑊死穴，所以周一鑊其後出席一個活動時，就話任何人對另一人嘅背景作出中傷嘅言論，都構成歧視，又話雖然依家嘅歧視法例未有保障內地新移民，但呢啲歧視嘅言論都要受到譴責，尤其係公職人員同議員，更唔應該發表咁不負責任嘅言論喎。周一鑊講得咁口響，究竟佢有冇自己反省過，有關中港矛盾問題係佢同貪曾種下咁嘅因呢？點解依家要市民承受晒個惡果呢？