中環出更：細女出嫁了 肥亨「玲」舍不捨

肥亨人緣佳，尋日唔少新舊高官同商界友好齊來見證新人嘅甜蜜一刻，包括前保安局局長李少光、發展局局長陳茂波、即將卸任嘅醫管局主席胡定旭、和黃集團總經理霍建寧夫婦、金融發展局主席查史美倫等。兩位前任政務司司長唐英年、林瑞麟不約而同攜眷出席，但未見二人有交流。

大讚女婿踏實上進

笑到四萬咁口嘅肥亨打趣話，短時間內多咗兩個咁大嘅仔，唔使懷胎十月同供書教學，計落認真着數。佢大讚Ian踏實上進，畀足一百分，希望女婿同囡囡相愛一生，仲要好似自己咁擴大家庭喎！至於有乜忠告一對新人，肥亨就話，雖然男人係一家之主，但聖經話男人係個「頭」，太太係條「頸」，只要永遠記住係條頸支配個頭就得喇，意味叫女婿要聽晒佢囡囡話；肥亨又希望新人快啲生兒育女。

一對新人喺眾人見證下於教堂行禮。（受訪者提供）

新人互為對方戴上婚戒，一臉幸福。（受訪者提供）

卓妮問佢送咗咩禮物畀囡囡？佢回答：「冇喎，已經送咗一生教育同愛畀佢啦！」話就咁話，其實馬太王培琪同Christine以聯名嘅公司名義，添置一輛價值近三百萬港元嘅賓利（Bentley）名車做花車，車牌英文以姓別「MA（馬）」命名，認真有心思。

馬時亨夫婦同大女特意為露玲添置賓利汽車做花車。	霍建寧夫婦十指緊扣現身。	林瑞麟（右）話全靠太太幫佢瘦身成功。
唐英年（右）拖實太太郭妤淺出席婚禮。

肥亨話，最唔習慣以後冇咗囡囡每日同佢講「早晨」同「晚安」，以後只好將對囡囡嘅愛投射到太太身上。馬太就冧爆咁話，Andrea好有孝心，出嫁前分別寫好兩封信畀佢同老公，答謝父母養育之恩。

講番一對新人，據知Andrea同Ian邂逅於教會內嘅讀經班，雙方暗地裏一直互相傾慕，後來Ian終於鼓起勇氣向伊人展開追求，仲行埋「外父外母政策」，咁識做，梗係成功抱得美人歸啦！

早前赴英深造神學嘅林瑞麟話，日前已畢業回港，現正以教友身份，喺教會團契同學校傳道。卓妮見佢清減咗，佢話留學期間踩單車返學，加上太太煮啲清淡又好味嘅餸畀佢食，日子有功搣甩肥肉。

卓妮