英美先後高調表態支持香港落實雙普選，繼外交部嚴詞駁斥外國干預香港政制後，全國人大常委范徐麗泰尋日又話，唔好天真地相信外國會協助香港爭取普選，只係部分外國國家唔想睇到中國壯大，想製造麻煩同危機，令中國唔能夠全力發展經濟。她又反問有關國家，如真誠關心港人，係咪願意接收香港人到佢哋認為真正民主嘅地方生活。不過，「佔領中環」行動發起人陳健民就反駁，不應以國籍區分其他國家係咪真心支持民主喎。唔知喺范太眼中，陳健民嘅想法係咪太天真呢？
