食物及衞生局局長高永文尋日出席活動大爆自己成世人都誤打誤撞，首先盲舂舂咁做咗醫科生，之後做埋專科醫生、醫管局管理層同局長，但由始至終都係咁驚考試，而考試又冇離開過佢，就好似爬山咁喎。就咁睇嚟，高永文好似見步行步，無乜計劃就做咗最高民望嘅局長，難怪與會嘅導師都話聽過有位想讀醫科嘅學生，因為想做局長先讀醫啦，搞到全場大笑，而高永文就鬼咁尷尬。
話說高永文尋日出席香港醫學專科學院二十周年開放日演講時話，佢喺會考嗰年已覺得考試好痛苦，以為讀完高中就舒服晒，點知考完高中試，又要考入大學讀醫科，最後仲有大學畢業試添！之後終於做咗醫生，點知又要考專科醫生試、英國皇家醫學院嘅考試等。直到去醫管局做管理層時，為咗學習管理知識，又要參與相關碩士學位課程考試。
不過，高永文話，其實佢行醫嘅過程並唔順利，因為曾經被投訴，但明白總會有病人對醫生專業服務有意見，呢啲係病人嘅權益。佢又話，無論做臨床或者管理都係醫人、醫社會。估唔到佢從冇讀醫科嘅念頭，到頭來做咗醫生，之後仲做埋最高民望嘅局長，其實佢嘅人生係一帆風順至真。