政情：愛女嫁妝 王庭聰送豪宅
大埔臨海低密度豪宅新盤前日開售，現場曾出現一位擁有中港車牌嘅神秘人「王先生」豪擲一千六百萬元購入逾千呎豪盤送畀愛女做嫁妝。其實呢位神秘人就係從事紡織生意嘅港區全國人大代表王庭聰，佢為愛女終生幸福着想出手認真闊綽。
強調唔畀壓力催「造人」
王庭聰愛女王麗霞（Crystal）快將同拍拖五年嘅金融才俊拉埋天窗，一直居住大埔十多年嘅王庭聰話，原本諗住女兒都住喺佢屋企附近，但佢睇中咗呢個新樓盤，加上只係距離十分鐘車程，所以就為女兒購入結婚居所。對於購入嘅居所屬於四房單位係咪意味想快啲有孫抱，王庭聰強調唔會畀壓力佢哋，相信佢哋有自己時間表喎。
問及樓市「辣招」對於入市嘅影響，王庭聰認為，「辣招」有一定成效，認同各方應支持政府興建多啲公屋同居屋，又提及覓地建屋同時要留意配套，好似有冇足夠工人開工，佢建議喺不影響本地工作就業前提下，考慮係咪要輸入外地工人喎。