政情：長毛扮勤力 發叔懶慣
立法會終於放完悠長暑假，七十名議員開始復工。立法會秘書處前日公布十八個事務委員會新一年度嘅委員名單，以加入委員會數目計算，表面上最勤力嘅係「長毛」梁國雄，一個人報名加入咗十一個委員會，但根據往績，長毛好可能只係扮勤力。至於鄉議局主席劉皇發（發叔），就只係加入咗兩個委員會，連扮勤力都費事扮，難怪佢會被人叫做「立法會大懶蟲」喇！
「梁十一」多遲到早退
每年十月，所有立法會議員都會根據自己嘅喜好或黨內分工，重新報名加入各個事務委員會。其中長毛喺本年度一口氣加入咗交通、房屋、發展、人力、保安、政制、福利、公務員及資助機構、教育、資訊科技及廣播、以及司法及法律等十一個事務委員會，驟眼睇就相當勤力，但佢出晒名開會成日遲到早退，又唔睇文件備課，好多時求其現身掟吓嘢、掃吓枱，鬧完兩句之後，就立即轉身走人，前後開會唔夠十分鐘。究竟係咪咁就叫做勤力，真係見仁見智。
有多名議員都加入咗七至八個事務委員會，大部分係直選議員，明顯係想博曝光爭表現。建築、測量及都市規劃界謝偉銓就報咗九個，喺功能界別議員中算係少見，希望佢到時會開足會，唔好喺四年過後被人發現出席率見紅啦。
劉僅入兩個 衰過舊年
至於被人叫做「大懶蟲」多年嘅發叔，今年就變本加厲，只係加入咗政制同發展兩個事務委員會，比去年再減少一個。內會主席梁君彥、飲食界張宇人、衞生服務界李國麟及工聯會黃國健，亦各自只加入咗三個事務委員會，數目同去年一樣。
呢份事務委員會委員名單，亦多少反映到呢班議員最着緊邊類議題。其中政制事務委員會今年有成四十二人、即過半數議員加入，相信係同新一輪政改諮詢即將展開有關。緊隨其後嘅發展事務委員會亦有三十三人加入，包括多名新界東議員，估計係為新界東北發展計劃而來。至於最少人加入嘅就係工商事務委員會，只有十四名委員，再次印證大部分議員都對香港嘅工商業發展漠不關心，難怪香港競爭力近年每況愈下喇！