中環出更：「鋒」波怕自駕 蔣麗芸苦了老公
立法會議員林健鋒早前自駕逆線行車被控不小心駕駛後，搞到好多議員都唔敢揸車，好似議員蔣麗芸（Ann）本身識揸車都要請司機。尋日咁啱司機放假，就要勞煩佢丈夫梁海明做「柴可夫司機」喇。奈何阿Ann周末都要落區連跑幾場，其中有個喺商場嘅活動仲搞咗兩個鐘咁耐，搞到梁海明喺商場呆等，行咗幾圈都未接到阿Ann。
司機放假 梁海明頂更
阿Ann尋日為一個關於兒童權利嘅活動做嘉賓，梁海明就負責揸車接送，點知個活動好耐都未完，本身低調坐喺觀眾席嘅梁海明可能悶到頂唔順，就去咗逛商場打發時間，點知行咗幾圈個活動都未完，惟有喺商場頂層挨住圍欄俯視阿Ann，直到活動完結佢先返去會場。
阿Ann話，自從做咗議員之後就唔敢揸車，覺得多嘢諗咗，揸車時又可能要回覆電話，所以都係請司機穩陣啲好。不過，佢個司機唔易做，好似尋日咁，阿Ann出席完商場活動後仲要去長沙灣視察發生火警嘅劏房，搞到老公都要跟住深入火災現場，要到夜晚兩夫婦先可以拍吓拖睇演唱會。
卓妮