中環出更：幼園爭位 楊華勇未雨綢繆
近日北區爆發幼稚園撲位潮，大批家長連日通宵排隊，只為索取一張入學申請表，情況令福建幫頭領楊孫西嘅兒子楊華勇（Johnny）好憂慮。Johnny話，雖然囡囡楊國盈（Jazlynn）只得八個月大，但係佢留意到呢兩日排隊情況咁緊張，已周圍收風研究心水幼稚園，佢太太莊菲娜（Fiona）亦開始湊囡囡返Playgroup（學前幼童遊戲小組），希望提早為入學幼稚園做準備。
Johnny尋日出席一個活動時，講起幼稚園排隊攞表件事就即刻話，到時就算要排隊輪候亦在所不惜。同場嘅保良局總理陳正欣就話，早幾年教育局因收生不足提出「殺校」政策，好彩佢哋預見幾年後有大批跨境學童湧港，決定縮班應對，如果唔係依家就頭痛喇！佢仲預期，呢股排隊攞表潮將來好可能會蔓延至小學都未定。
莊菲娜「掛住」囡囡
咁啱早幾日卓妮見到Fiona，佢戴住一條「Jazlynn」鑽石頸鏈，原來係為咗慶祝囡囡出世而特別設計，寓意佢時刻「掛住」囡囡。過去佢都送過自己設計嘅黑鑽吊墜及袖口鈕畀老公，仲笑笑口爆料話，Johnny話娶到佢嘅好處係唔使花錢送珠寶喎！咁仲未夠，Fiona和囡囡生日咁啱同月同日，Johnny呢位幸福老公連蛋糕都慳番一個。
當日Fiona嘅爸爸莊哲猛及媽媽駱英英都喺度，莊哲猛話，同楊孫西做親家之前已相識，但係子女彼此唔識，緣分認真奇妙。卓妮見佢哋全家人感情好好，莊哲猛笑笑口話，同太太結婚三十七年從未嘈過交，佢嘅處世秘訣係奉行「三樂」，即知足常樂、助人為樂及自得其樂。
卓妮