馮京當馬涼大家聽得多，致辭當辭職嘅笑話又聽過未？未聽過唔緊要，依家就畀你見識吓。嗱，呢個笑話由自詡「公信第一」嘅《明報》自編自導，詼諧得嚟又荒謬，包你眼界大開o架。
話說《明報》即時新聞網尋日早上報道特首梁振英等高官出席十一升旗儀式，其中提及特區政府稍後將會喺會展舉行酒會，唔知攞景定贈興，居然話「特首稍後將辭職」，引起一片嘩然。好多網民仲以為《明報》收到內幕消息，知道乜嘢「B計劃」、「C計劃」，所以提早預告特首辭職添。結果呢篇報道喺網上廣泛流傳近兩小時後，《明報》先至發出「更正及道歉啟事」，承認出現重大錯誤，特首「將致辭」錯寫成「將辭職」，向讀者致歉喎。
所以話，信佢一成，雙目失明。《明報》成日自吹「公信第一」，自我安慰，自我滿足，其實烏龍百出，笑話多多，搞到「更正與澄清」幾乎成為每日例行公事。最經典就係當年北京奧運閉幕禮上，英國球星碧咸明明喺雙層巴士上一腳踢走個波，但《明報》即時新聞網居然話佢由巴士跳落嚟，一邊踢波一邊衝向人群喎。連舉世矚目嘅新聞都可以添油加醋亂咁作，仲好意思話自己「公信第一」，面皮都算夠厚咯。唔怪得有人話，《明報》最有公信力嘅就係「更正與澄清」，真係一啲都冇講錯。
功夫茶諗極都唔明，《明報》吹水唔抹嘴，自認係識字分子報紙，點解連「致辭」同「辭職」咁簡單嘅詞語都會搞錯？究竟係手民之誤定係另有目的吖？你知喇，今時今日嘅香港七國咁亂，陰謀論滿天飛，如果有人故弄玄虛，以便渾水摸魚，都唔係冇可能！
講開又講，《明報》除咗公信破產，仲陰陽怪氣，經常自取其辱添。呢嗱，足總副主席貝鈞奇告《明報》年前一篇社評誹謗，早前法庭裁定《明報》敗訴，須向原告賠償五十萬元兼付訟費，呢啲咪叫自作孽不可活，唔衰攞嚟衰囉！
即係咁，有人面皮夠厚，鍾意自吹自擂，本來與旁人無關，問題係今時唔同往日，商品說明修訂條例已經生效，如果有人再隨便自稱「乜乜第一」，隨時觸犯法例，涉及「不良營商手法」，咁就唔係自慰咁簡單喇。
正如古人話齋，世不患無法，而患無必行之法。當局有必要認真查一查，睇吓係咪有人涉嫌牴觸法例，誤導公眾。須知謠言可畏，誤導公眾嘅後果可大可小o架，今次就話將致辭當辭職啫，如果下次又搞出好似當年亞視誤報江澤民「死訊」嘅大烏龍，咁就大吉利是喇！