政情：盛品儒唔返亞視 除非做嘉賓
亞視前執董盛品儒（James）黯然離開電視台後，依然好活躍。早前有日下午四點鐘，我哋就見佢獨自喺金鐘太古廣場的士站等車，雖然佢唔使返工，但依然西裝骨骨，邊等的士邊玩手機。不過，佢企咗十分鐘都未有車，可能平時慣咗有車接送，此刻顯得有點唔耐煩，不時翹手東張西望，又撳吓手機解悶。
近排無開工 獲邀會諗吓
我哋就上前同James傾兩句，佢笑言無意重返亞視：「出咗嚟就費事，清清楚楚好啲！」但佢不忘留後着話，若然亞視邀請佢返去做節目嘉賓，都會諗吓喎。轉過頭，James又風騷現身灣仔會展舉行嘅資訊科技界酒會，自嘲老友知佢近排無業好得閒，爭住輪流約食飯，笑言以前忙到無暇應約，所以好享受依家同朋友歡聚時光喎。
James又透露，會放自己一個悠長假期去旅行，明年先重返工作崗位。即係做咩工作呢？佢就賣關子話，自己向來有投資物流及電子商貿生意，正構思進軍新媒體如遊戲平台，亦都唔排除返內地發展，總知不愁無出路喎。