政情：厚顏去酒會 貪曾冇人理
東方報業集團早前獨家踢爆「貪曾」前特首曾蔭權爵士被廉政公署刑事調查連串貪腐醜聞，但佢都仲同一班「曾朋友」搭豪華郵輪豪遊地中海多國，而近日更被揭發喺在任時涉嫌為乞求同前教宗本篤十六世見面，透過公務員進行「魔鬼交易」。面對醜聞不絕，貪曾尋日竟然仲有面目出席十．一活動，真係厚顏無恥。正因為貪曾臭名遠播，所以都冇咩人騷佢，佢惟有面懵懵強顏歡笑。
祝酒被漠視 面懵傻笑
貪曾尋日同太太曾鮑笑薇出席灣仔金紫荊廣場舉行嘅十．一活動，佢到場時就懶主動咁同啲舊下屬握手，但唔係個個都理佢。由於貪曾佩戴嘅眼鏡係變色鏡，鏡片喺戶外自動變成深色，佢於是成為唯一一個「戴黑超」嘅嘉賓，非常礙眼，似乎唔係好尊重，亦貫徹佢一向目中無人嘅性格。
其後酒會開始，話說一眾嘉賓在台上互相祝酒，點知「貪盡海陸空」嘅貪曾攞起咗杯香檳，未有人即時同佢祝酒，佢惟有強顏歡笑，好多嘉賓飲完飲剩先至同佢祝酒。直至貪曾落台時，由佢一手提攜嘅財政司司長曾俊華先同佢寒暄咗幾秒咁大把。
拒回應乞見教宗醜聞
貪曾喺會場內逗留咗一陣，但都冇咩人理佢，惟有自己飲下嘢，同太太棟喺度眼望望、手指指。期間除咗「幫港出聲」召集人周融同佢傾咗兩句外，都冇咩人埋去同佢傾偈，佢惟有向啲外籍人士埋手。貪曾同外籍人士傾偈期間，唔知講咩講到七情上面，但個外籍人士似乎有啲疑惑，淨係拎住張疑似貪曾卡片嘅紙仔頭耷耷。
酒會之後，直到尋晚紅館仲有場文藝表演晚會，有得免費睇騷，貪威識食最唔執輸嘅貪曾梗係有出席啦。醜聞纏身嘅貪曾被記者問到落口供落成點、係咪幾次透過「魔鬼交易」要求見前教宗等問題時，佢就一一拒絕回應，然後一支箭咁步入會場。