中環出更：大劉聞「大鼻」嚇到甩褲？
捲入澳門巨貪案嘅華人置業主席劉鑾雄（大劉），一直因病為由拒絕到澳門受審，但日前又聲稱有人陷害佢、屈佢、被人霸佔財產，更喊驚話自己被逼到走投無路，猶如被強姦。不過，佢身在香港，每日中午如常健步如飛到灣仔富豪飯堂食飯。尋日佢又去咗富豪飯堂食晏，當記者問到「大鼻有冇搵你？」時，佢就即刻皺一皺眉頭、抽一抽褲頭。咁大反應，唔通佢被「大鼻」個名嚇到甩褲？
尋日下午十二時四十分，着住藍色風褸、灰色西褲嘅大劉先抵達富豪飯堂，而佢媽媽葉淑婉、胞妹劉玉珍就隨後到達。隔咗冇幾耐，佢女友甘比亦同仔女到達，幾名保安就擔遮為佢哋擋太陽「開路」。大劉到達酒家時，現場就有記者問佢︰「大鼻有冇搵你呀？」點知佢就即時皺一皺眉頭，仲抽一抽褲頭，急步行入酒家。佢哋一家人食咗約一個鐘頭，齊齊登上七人車離開。
「霸道」被轟 知衰讓路
我哋日前曾報道過大劉到達酒家時保安嘅「霸道」攔路陣勢，惹來途人不滿，仲激嬲一名外籍男途人添。唔知係咪有關人士知衰，話說尋日大劉抵達富豪飯堂前，幾名保安準備擺陣，咁啱又有途人過路，我哋就聽到現場嘅保安甲同保安乙講：「畀人過！畀人過！」然後向記者講：「畀咗人過，唔好再話我哋喇！」
卓妮